Dán an Domhnaigh #LeChéile: Just Add Potato - do Dhónall ar a Lá Mór Breithe, 15 Bealtaine 2020 le hAifric Mac Aodha

03 Iúi

Ba mhaith linn an dán seo, “Just Add Potato ” a roinnt libh mar chuid den tsraith “Dán an Domhnaigh”. Scríobh Aifric Mac Aodha é. #LeChéile

Focail Faoin Dán:

Bhíos ag gearán le deartháir liom nach raibh uaim sa saol ach curry chips, agus sheol sé Knorr’s Medium Curry Sauce chugam sa phost mar aon leis an nóta ‘Just Add Potato’. Le breith ar a chineáltas in aimsir an chuibhrithe, chumas an píosa seo dá lá breithe.

Just Add Potato

Nuair a d’inis sí dó go pusach
go raibh a sáith aici faoin tráth seo
den iora glas is dá eireaball dosach
ar an staighre éalaithe
sa ghairdín cúil i gCúil-na-Greina
agus go dtabharfadh sí a dhá súil
ar sceallóga Aprile ar maos in anlann,

Is iomaí fear eile ann
a chuirfeadh in iúl dá dheirfiúr
de rois nárbh aon chabhair dó
an cineál sin criongáin
agus é seasta sa scuaine,
ag feitheamh ar a sheal san ollmhargadh,
an turas breithlae go Meiriceá curtha ar ceal
agus an chloch mhíle ag dul sa mhuileann air.

Ní hamháin gur fhan an mac lár báire,
soirbhíoch an teaghlaigh, ina thost,
ach chuir sé Knorr’s Medium Curry Sauce,
riar a cáis, chuici sa phost.

Aifric Mac Aodha:

Tá Aifric Mac Aodha ag obair ina heagarthóir cúnta leis an nGúm. D’fhoilsigh An Sagart an chéad chnuasach filíochta léi, Gabháil Syrinx, sa bhliain 2010. Chaith sí seal ina heagarthóir ar Comhar agus, le tamall de bhlianta, tá sí ag obair ina heagarthóir filíochta ar The Stinging Fly, gorse agus Trumpet. Bhronn An Chomhairle Ealaíon mórchuid sparánachtaí uirthi agus bhain sí an chéad duais san Oireachtas sa bhliain 2016. Chuir The Gallery Press cnuasach léi i gcló le déanaí, Foreign News (aistriúcháin le David Wheatley, 2017).

Foinse: Focail agus dán le Aifric Mac Aodha

Cuir d'ainm ar ár liosta poist

Cuir d'ainm ar ár liosta poist leis an nuacht is déanaí maidir le Foras na Gaeilge a fháil.