Luach os cionn €400,000 de dheontais ceadaithe ag bord Fhoras na Gaeilge  

17 Mei

Ag cruinniú boird de chuid Fhoras na Gaeilge ar an 14 Meitheamh 2019, in oifigí Fhoras na Gaeilge i Ráth Chairn, Co. na Mí, ceadaíodh luach €427,805 de dheontais i réimsí na hóige, na scríbhneoireachta agus na foilsitheoireachta.

Ceadaíodh deontais dar luach €247,825 do Scéim na nImeachtaí Óige 2019/20, a thugann deiseanna úsáide do dhaoine óga, a spreagann iad chun an Ghaeilge a úsáid i mbealach spraíúil. Cuirfidh na deontais ar chumas na ndeontaithe ar a laghad 12 sheisiún a eagrú le linn thréimhse na scoilbhliana, atá dírithe ar dhaoine óga idir 3 bliana agus 18 mbliana d’aois taobh amuigh den scoil. Meastar go mbeidh deis ag nach mór 4,000 páiste a bheith rannpháirteach sna himeachtaí.

I réimse na foilsitheoireachta ceadaíodh luach €140,480 de choimisiúnaithe faoi Scéim na gCoimisiún 2019 le tacú le lucht liteartha na Gaeilge freastal ar an éileamh sna réimsí éagsúla léitheoireachta. Anuas ar na deontais i réimse na foilsitheoireachta, bronnfar deontais dar luach €39,500 ar ábhar scríbhneoirí agus ar mheantóirí faoi Scéim Meantóireachta 2019. Tugann an scéim seo deis luachmhar do scríbhneoirí i dtús a ré scríbhneoireachta comhairle faoina gcuid scríbhinní agus faoi cheird na scríbhneoireachta i gcoitinne a fháil ó scríbhneoirí aitheanta.

Dúirt príomhfheidhmeannach Fhoras na Gaeilge, Seán Ó Coinn, “Is cúis dóchais dom an t-éileamh mór ar Scéim na nImeachtaí Óige ó bhliain go bliain agus tiomantas na n-iarratasóirí ó thaobh deiseanna a sholáthair do dhaoine óga an Ghaeilge a úsáid ar bhonn sóisialta taobh amuigh den scoil. Is cás linn, áfach gur tháinig laghdú 26% ar an gciste don scéim seo i mbliana agus nach mbeidh ar ár gcumas ach tacú le líon céanna na ndeontaithe. Tá maoiniú Fhoras na Gaeilge laghdaithe go mór ó thréimhse na géarchéime eacnamaíochta agus níl méadú i ndiaidh teacht ar an mhaoiniú ó shin.

Maidir leis an Scéim Meantóireachta, is ábhar dóchais mar an gcéanna againn go bhfuil scríbhneoirí nua ag teacht chun cinn agus iad ag iarraidh feabhas a chur ar a gceird tríd an Scéim Méantóireachta. Tá borradh le blianta beaga anuas ar an bhfoilsitheoireacht Ghaeilge, go háirithe i seánra leabhar na bpáistí, agus tá súil againn go mbeidh na scríbhneoirí atá ag fáil tairbhe as an scéim seo ag teacht chun cinn mar scríbhneoirí Gaeilge sna blianta beaga amach romhainn.”

Críoch

 

Tuilleadh eolais

Anna Davitt, Clárbhainisteoir: Cumarsáid, Margaíocht & Feasacht, Foras na Gaeilge

Teil: 0035387 673 6175    

Ríomhphost: adavitt@forasnagaeilge.ie

Cuir d'ainm ar ár liosta poist

Cuir d'ainm ar ár liosta poist leis an nuacht is déanaí maidir le Foras na Gaeilge a fháil.