Beidh Scéim na bhFéilte oscailte do ghrúpaí áitiúla cuí chun deis a thabhairt dóibh forbairt a dhéanamh ar fhéilte ealaíon nó ar eilimintí d’fhéilte atá á reáchtáil agus á gcur i bhfeidhm trí mheán na Gaeilge nó a bhfuil na healaíona Gaeilge mar chuid lárnach díobh.

Díríonn an scéim seo ar fhéilte a bhfuil d’aidhm acu an Ghaeilge, na healaíona Gaeilge, na healaíona dúchasacha agus oidhreacht na Gaeilge a chothú agus a chur chun cinn trí mheán na Gaeilge nó go dátheangach, mar dhlúthchuid den fhéile, agus ardán a chur ar fáil do phobal na Gaeilge, don mhórphobal agus d’earnáil na n-ealaíon.

Spriocdháta: 12 meán lae an 18 Deireadh Fómhair 2019

Cáipéisí:

190912 Treoirlínte Critéir Féilte Gaeilge 2020 (Sc. na bhFéilte)

190912 Treoirlínte Critéir Féilte Béarla 2020 (Sc. na bhFéilte) 190913

Foirm Iarratais Féilte 2020 (Sc. na bhFéilte)

Tabhair faoi deara go gcaithfidh gach iarratasóir an seicliosta um chumhdach cuí a chur isteach leis an iarratas, tá na seicliostaí ar fáil thíos:

190912 Seicliosta Cumhdach leanaí_ó dheas (Sc. na bhFéilte)

190912 Seicliosta Cumhdach leanaí_ó thuaidh (Sc.na bhFéilte)

Ag a gcruinniú Boird Dé hAoine an 13 Meán Fómhair 2019, rinne Bord Fhoras na Gaeilge cinneadh maoiniú a cheadú go ceann bliain eile faoi Scéim na Meán Gaeilge, do Comhar; Tuairisc.ie agus Nós.

Agus é ag caint ar chinneadh an Bhoird, dúirt Príomhfheidhmeannach Fhoras na Gaeilge, Seán Ó Coinn:

“i ndiaidh anailís a dhéanamh ar na haighneachtaí a fuarthas mar chuid den chomhairliúchán poiblí ar tháinig deireadh leis ar an 15 Lúnasa 2019, ba léir dúinn nach raibh tacaíocht ó na daoine a sheol aighneachtaí chugainn, dár moltaí, agus bunaithe air sin tá cinneadh déanta ag an Bhord leanúint leis an gcur chuige reatha go ceann bliain eile”.

As an 107 aighneacht a fuair Foras na Gaeilge faoin gcomhairliúchán, bhí an mhórchuid acu ag moladh leanúint leis an gcur chuige reatha. Faoin gcur chuige reatha, cuireann Foras na Gaeilge €0.5m sa bhliain ar fáil do thrí chonraitheoir reatha: €298k do Tuairisc.ie; €120k do Comhar agus £68k do Nós.

De bharr gur trí phróiseas tairisceana a bronnadh na conarthaí reatha ar na soláthróirí reatha, beidh an maoiniú bliana á chur ar fáil de réir théarmaí na gconarthaí reatha.

Arsa an Príomhfheidhmeannach ar an fhoras thuaidh theas:

“is léir go bhfuil léitheoirí na dtrí fhoilseachán seo sásta leis an ábhar a chuireann siad ar fáil, agus, cé go bhfuil dúshláin éagsúla fós le réiteach, agus muid ag iarraidh cur le líon na ndaoine as an phobal atá ag léamh an ábhair a fhoilsíonn siad, ní mór dúinn cluas a thabhairt do na daoine atá á léamh faoi láthair”.

Beidh deireadh ag teacht leis na conarthaí reatha ar a 31 Nollaig 2019, agus mairfidh an maoiniú a chuirfidh Foras na Gaeilge á thairiscint dóibh anois go dtí 31 Nollaig 2020.

Beidh tuarascáil iomlán á foilsiú ar shuíomh gréasáin Fhoras na Gaeilge go luath ar an chomhairliúchán.

Críoch

Tuilleadh eolais:
Anna Davitt, Clárbhainisteoir: Cumarsáid, Margaíocht & Feasacht, Foras na Gaeilge
Teil: 0035387 673 6175
Ríomhphost: adavitt@forasnagaeilge.ie

Tá comórtas Beo dírithe ar an aoisghrúpa 11 – 18 bliain d’aois agus é mar aidhm aige bannaí ceoil óga Éireannacha a chumasú agus suim sa cheol a spreagadh i measc na hidirbhliana agus daoine óga.

An féidir linne cur isteach air? 

Fáiltítear roimh iarratais ó mheánscoileanna, gaelscoileanna, clubanna óige, coláistí samhraidh, clubanna CLG, cumainn CCÉ, Ógras, Spleodar, Foróige etc, ó thuaidh agus ó dheas, thoir agus thiar, a fhad agus go gcloítear leis an gcoinníoll i dtaobh aoise.  

Anuas air sin:

• Caithfidh an t-amhrán bheith nuachumtha agus i nGaeilge. 
• Caithfidh gach iarrthóir bheith faoi 18 agus thar 11 ar an 31/10/2019. 
• Is féidir meantóir thar 18 treoir agus comhairle a chur ar fáil. 
• Is gá do dhuine fásta bheith in éineacht le haon ghrúpa atá le páirt a ghlacadh sa chraobh ar an 31 Deireadh Fómhair.
• Níor chóir go mbeadh níos mó ná seachtar in aon bhanna amháin. 
• Ní féidir leis an amhrán bheith níos faide ná 5 nóiméad ar fhad.
• Caithfidh an duine/grúpa bheith sásta an t-amhrán a chur i láthair beo ag babhta ceannais an chomórtais ag Oireachtas na Samhna 2019. 
• Beidh ar gach iarratas físeán (nach rachaidh thar teorainn 8 nóiméad) a dhéanamh ina bhfuil an t-amhrán á chanadh agus cur síos gearr déanta faoi scríobh an amhráin.
• Iarrtar ar ghrúpaí cruthúnas a chur ar fáil maidir le hiarrachtaí ar bith atá déanta le poiblíocht a fháil don togra sna meáin shóisialta (Facebook, Twitter, Snapchat, Instagram agus ar ardáin eile ar na meáin shóisialta).
• Roghnófar uasmhéad de 8 mbanna le páirt a ghlacadh i mbabhta ceannais an chomórtais.

Tá an togra oiriúnach do ghrúpa ach go háirithe mar gur féidir le baill éagsúla an ghrúpa de dhíth le díriú ar na gníomhaíochtaí seo a leanas: 

• Cumadh an amhráin
• Ceol a chur leis
• Físeán a ullmhú
• Scaip an scéal ar na meáin shóisialta
• An cur i láthair a eagrú don bhabhta ceannais

Córas Moltóireachta:

Dáilfear marcanna ar na gnéithe seo le hiarratais a roghnú don bhabhta ceannais:

1. An t-amhrán – 50% 
2. An físeán YouTube– 30% 
3. Iarrachtaí eile le poiblíocht a fháil don amhrán ar na meáin shóisialta – 10%
4. Gníomhaíochtaí an ghrúpa tacaíochta – 10%

Spriocdháta agus próiseas:

1.  Spriocdháta le hiarratas a chlárú agus físeán (nasc d'fhíseán YouTube) a sheoladh isteach go leictreonach: 14 Deireadh Fómhair 2019,  5.00 p.m. 

2. Babhta ceannais an chomórtais: Le linn Scléip na hÓige ag Oireachtas na Samhna, san Óstán Citywest, Baile Átha Cliath, Déardaoin an 31 Deireadh Fómhair (beidh ar ghrúpaí a cháilíonn don bhabhta ceannais a bheith ann ó am lóin an lá sin do thástálacha fuaime). 

Foirm iarratais:

Is féidir íoslódáil a dhéanamh ar an bhfoirm iarratais anseo: Foirm Iarratais Beo 2019 agus ní mór foirmeacha a líonadh amach ina n-iomláne agus a sheoladh chuig snicgearailt@forasnagaeilge.ie roimh an 14 Deireadh Fómhair 2019, 5.00 p.m. 

Is faoi gach iarrthóir atá sé deimhniú go bhfaigheann Foras na Gaeilge an t-iarratas faoin spriocdháta. 

Ceisteanna agus tuilleadh eolais:

Is féidir teagmháil a dhéanamh le Sinéad Nic Gearailt ag 353-1-6398464 nó ag snicgearailt@forasnagaeilge.ie le tuilleadh eolais a fháil.

D’fhógair An tOireachtas, i gcomhpháirt le Foras na Gaeilge, inniu (Déardaoin, 15 Lúnasa 2019) na leabhair atá ainmnithe ar na Gearrliostaí do Gradam Réics Carló (Leabhar na Bliana don Léitheoir Óg), Gradam Uí Shúilleabháin (Leabhar na Bliana don Léitheoir Fásta) agus gradam úrnua do shaothar aistrithe go Gaeilge ó theanga eile, Gradam de Bhaldraithe.

Roghnaítear na buaic-shaothair de réir na gcritéar seo a leanas: fiúntas an ábhair; caighdeán na Gaeilge; dearadh an leabhair, ag áireamh téacs, clúdach, léaráidí agus dea-chleachtas foilsitheoireachta; caighdeán foilsitheoireachta; agus mar a fhreastalaíonn an leabhar ar riachtanais an mhargaidh léitheoireachta.

Tá seacht leabhar déag (17) roghnaithe ar ghearrliostaí na bliana seo - Sé (6) leabhar ar ghearrliosta Ghradam Uí Shúilleabháin, cúig (5) leabhar ar ghearrliosta Ghradam Réics Carló agus sé (6) leabhar ar ghearrliosta Ghradam de Bhaldraithe. I measc na dTithe Foilsitheoireachta a bhfuil leabhar ainmnithe acu i mbliana tá, Cló Iar-Chonnacht, Cois Life, Dalen Éireann, Foilseacháin Ábhair Spioradálta, Futa Fata, Leabhar Breac, agus LeabhairCOMHAR. Tá liosta iomlán den trí ghearrliosta ar fáil thíos.

“Déanaim comhghairdeas ó chroí le gach Teach Foilsitheoireachta atá ar ghearrliostaí na bliana seo”, a dúirt Liam Ó Maolaodha, Stiúrthóir an Oireachtais. “Tá fás agus forbairt dochreidte tagtha ar earnáil na foilsitheoireachta Gaeilge agus tá áthas orainn, mar eagraíocht, a bheith bainteach leis sin agus aitheantas cuí a thabhairt don obair mhór atá ar siúl. Tugann sé misneach dúinn go bhfuil seacht leabhar déag á bhfógairt againn inniu a foilsíodh le deich mí anuas agus tréaslaím leis na Tithe Foilsitheoireachta as an díograis, an paisean agus sár-chaighdeán na foilsitheoireachta atá acu”, a dúirt sé.

Dúirt Príomhfheidhmeannach Fhoras na Gaeilge, Seán Ó Coinn, “Déanaim comhghairdeas leis na foilsitheoirí uile atá ar ghearrliostaí na bliana seo. Tá fás mór i ndiaidh teacht ar fhoilsitheoireacht na Gaeilge le 20 bliain; tá leabhair den scoth á bhfoilsiú, agus réimse an-mhaith ar fáil anois i raon leathan seánraí, do dhaoine ar spéis leo ábhar léitheoireachta i nGaeilge. Tá lúchair orm go bhfuil na gradaim fhoilsitheoireachta á leathnú amach agus gradam úr, Gradam de Bhaldraithe, curtha leo i mbliana den chéad uair chun aitheantas cuí a thabhairt dá saothar i réimse an aistriúcháin.  Guím gach rath ar na Tithe Foilsitheoireachta”.

Fógrófar na buaiteoirí ag oíche mhór liteartha, ag a ndéanfar ceiliúradh ar gach gné de scríbhneoireacht na Gaeilge, i dTeach an Ardmhéara, Baile Átha Cliath, Dé Máirt, 1 Deireadh Fómhair 2019, tráth a ndéanfaidh Leabhair COMHAR Portráidí Scríbhneoirí Gaeilge 2020 a nochtadh.  Gabhann duaischiste de €17,000 leis an trí ghradam foilsitheoireachta. Tá eolas cuimsitheach maidir leis na leabhair ar fáil ag www.antoireachtas.ie.
 

Le haghaidh tuilleadh eolais: 
Louise Ní Dháibhéid, An tOireachtas     T: 00353 87 1005439      R: louise@antoireachtas.ie

Nótaí don Eagarthóir

1. Bronnfar na duaiseanna mar seo a leanas: €5,000 ar fhoilsitheoir an leabhair do Ghradam Uí Shúilleabháin agus €2,500 ar údar an tsaothair; €5,000 ar fhoilsitheoir an leabhair do Ghradam Réics Carló, €1,250 ar údar an tsaothair agus €1,250 ar mhaisitheoir an tsaothair; €1,500 ar fhoilsitheoir an leabhair do Ghradam de Bhaldraithe agus €500 ar aistritheoir an tsaothair.
2. Is iad Foras na Gaeilge a dhéanann urraíocht ar na Gradaim Fhoilsitheoireachta.
3. Is Ceanneagraíocht é An tOireachtas sa réimse, ‘Deiseanna a thacaíonn le hÚsáid na Gaeilge agus Bunú Gréasán’.
4. Tá Comórtais Liteartha an Oireachtais ar an bhfód ón mbliain 1897 agus tugann siad aitheantas agus ardán thar a bheith luachmhar do scríbhneoirí na Gaeilge. Tá cuid de mhórscríbhneoirí an chéid seo caite, Pádraig Mac Piarais, Máirtín Ó Cadhain agus Nuala Ní Dhomhnaill i measc iar-bhuaiteoirí na gcomórtas seo.
5. Eagraíonn an tOireachtas príomhfhéile náisiúnta na nGael, Oireachtas na Samhna, go bliantúil agus chuimsíonn comórtais do dhaoine óga agus do dhaoine fásta sna taibh-ealaíona traidisiúnta mar aon le réimse leathan imeachtaí ceoil, amhránaíochta, caidrimh, siamsaíochta, spóirt agus dioscúrsa.
6. Bíonn eolas cothrom le dáta i gcónaí ar www.antoireachtas.ie maidir le himeachtaí agus comórtais uile na heagraíochta.

Gradam Uí Shúilleabháin

Gradam Réics Carló

Gradam de Bhaldraithe

Ag cruinniú i mBéal Feirste ar an Aoine an 26 Iúil, rinne bord Fhoras na Gaeilge cinneadh infheistíocht ar luach €241,572 a dhéanamh thar trí bliana i Scéim na Scoláireachtaí Gaeltachta 2020-2022. Beidh an scéim ag freastal ar 3 ghrúpa go sonrach lena n-áirítear scoláirí faoi 18 (dírithe ar Thuaisceart Éireann amháin), daoine fásta (dírithe ar an tír ina hiomláine) agus teaghlaigh (dírithe ar an tír ina hiomláine).

Chuir Foras na Gaeilge €80,524 ar fad ar fáil le linn na bliana reatha dá Chiste Scoláireachtaí a chuireann scoláireachtaí Gaeltachta ar fáil do dhaltaí scoile, do dhaoine fásta agus do theaghlaigh le freastal ar chúrsaí sa Ghaeltacht. Faoin scéim athbhreithnithe, cuirfear tuilleadh béime ar scoláireachtaí a chur ar fáil do scoláirí atá faoi mhíbhuntáiste chomh maith le hiarratasóirí ó na Bailte Seirbhíse Gaeltachta agus na Líonraí. Fógrófar an scéim i mí Mheán Fómhair nuair a cuirfear fáilte roimh iarratais ó eagraíochtaí ar mian leo na scéimeanna a riaradh.

Tá comhairliúchán poiblí ar siúl ag Foras na Gaeilge faoi láthair le tuairimí an phobail a lorg ar an mbealach is fearr le hearnáil na meán Gaeilge clóite agus ar líne a mhaoiniú as an gciste de €500k a chuireann Foras na Gaeilge ar fáil ar bhonn bliantúil do na foilseacháin tuairisc.ie; nós.ie agus Comhar.

Dúirt Cathaoirleach bhord Fhoras na Gaeilge, Pól Ó Gallchóir, “Tá sé ríthábhachtach go gcuireann an pobal, idir phobal na Gaeilge agus mhórphobal na tíre thuaidh agus theas a gcuid tuairimí in iúl dúinn lena chinntiú go mbeidh siad á gcur san áireamh sa chur chuige a bheidh ag Foras na Gaeilge don réimse tábhachtach seo ó 2020 ar aghaidh.”

Críoch

Tuilleadh eolais:

Comhairliúchán ar earnáil na meán Gaeilge

Beidh Foras na Gaeilge ag glacadh le freagairtí go dtí an 15 Lúnasa agus tá gach eolas faoin gcomhairliúchán ar fáil ar https://www.forasnagaeilge.ie/nuacht/comhairliuchan/

Scéim na Scoláireachtaí Gaeltachta 2020-2022

Fógrófar gach eolas faoi scéimeanna san fhómhar ar www.forasnagaeilge.ie. Is féidir clárú ar ár liosta teagmhála ar an suíomh gréasáin le heolas rialta a fháil faoi Fhoras na Gaeilge.

Seoladh Díolaim Focail Eile ar an 31 Iúil 2019 ag 6 p.m. i gceannáras Fhoras na Gaeilge, 63-66 Sráid Amiens, Baile Átha Cliath 1. Mar chuid den tionscadal Eorpach Focail Eile atá Díolaim á fhoilsiú. Is bailiúcháin é de phrós agus filíocht scríofa ag scríbhneoirí Gaeilge, Bascaise, Freaslainnise, Slóivéinise agus Macadóinise a ghlac páirt sa tionscadal. Sheol Príomhfheidhmeannach Fhoras na Gaeilge, Seán Ó Coinn an leagan clóite de Díolaim. Mar chuid den ócáid, roinn na scríbhneoirí Gaeilge a ghlac páirt sa tionscadal, Aifric Mac Aodha, Réaltán Ní Leannáin, Diarmuid de Faoite, Cathal Póirtéir, agus Colm Ó Ceallacháin, a gcuid taithí agus saothair.

Is clár comhpháirtíochta é an tionscadal liteartha Focail Eile idir eagraíochtaí cultúrtha agus teanga i réigiúin Eorpacha agus é d’aidhm aige líonra de shocrúcháin chruthaitheacha a chruthú do scríbhneoirí Eorpacha i mionteangacha agus teangacha mionlaigh. Le linn na socrúchán chaith na scríbhneoirí tréimhsí cónaithe i réigiúin pháirteacha ag obair ar ábhair a phléann le téamaí, saincheisteanna agus grúpaí sóisialta a bhaineann le teangacha neamhfhorleathana, agus scríobh siad téacsanna liteartha a phléann leis na hábhair seo, ag coinneáil i gcónaí teagmháil agus comhoibriú leis an bpobal óstach agus ag caitheamh solais ar an bpróiseas cruthaitheach.

Bhí sé ar cheann de chuspóirí an tionscadail litríocht a cheaptar i dteangacha mionlaigh nó i mionteangacha a chothú agus comhoibriú a chur chun cinn idir scríbhneoirí. Aistríodh na téacsanna go léir a cruthaíodh le linn na socrúchán go teangacha na gcomhpháirtithe agus go Béarla. Mar gheall air seo táimid in ann “focail eile” agus “focail daoine eile” a chomhroinnt.

Dúirt Príomhfheidhmeannach Fhoras na Gaeilge, Seán Ó Coinn, “Is tionscadal thar a bheith fiúntach é Focail Eile, a léirigh an dóigh ar féidir leis an stádas mar Phríomhchathair Chultúir na hEorpa dul i bhfeidhm, ní hamháin ar bhonn náisiúnta ach ar bhonn idirnáisiúnta. D’éirigh an tionscadal seo as an stádas mar Phríomhchathair Chultúir na hEorpa a bronnadh ar Donostia-San Sebastian in 2016. Thug sé deis annamh do scríbhneoirí Gaeilge agus scríbhneoirí i mionteangacha eile a saothar a chur i láthair lucht léitheoireachta i bhfad níos leithne ná a bheadh acu de ghnáth, agus chuir sé ardán idirnáisiúnta ar fáil dóibh. Lena chois sin, trí na socrúcháin chónaithe thar lear bhí deis ag na scríbhneoirí aithne agus eolas a chur ar scríbhneoirí eile a bhí ag saothrú sna mionteangacha sin agus sna réigiúin a bhí páirteach. B’iontach an rud é dá mbeifí le tógáil ar an tionscadal seo atá ina dheireadh anois agus an stádas mar Phríomhchathair Chultúir na hEorpa bronnta ar phríomhchathair chultúrtha agus Ghaeilge na hÉireann, Gaillimh.

Glao ar achoimrí

Cé gur minic a ndéantar faillí ann sa dioscúrsa ar obair théarmeolaíochta, tugann staidéar ar phrionsabail, modhanna, cur chuige agus stíleanna cheapadh na téarmaíochta i dteanga(cha) faoi leith léargais luachmhara ar iompar teangacha maidir le coincheapa a ainmniú, go háirithe i sainréimsí eolais. Is follas iompar éagsúil go háirithe agus comparáid á déanamh idir téarmaíocht teangacha ó fhinte teangacha atá éagsúil go maith óna chéile. Agus is minic a tharraingíonn cineálacha cur chuige i leith ceapadh téarmaíochta plé gleoiréiseach laistigh de phobail teangacha: má bhreathnaítear ar an gcaoi a nglacann úsáideoirí le téarmaí nó a bhféachann siad orthu ní hannamh na torthaí frithráiteach.

Dá réir sin, fáiltímid rompu siúd ar spéis leo an t-ábhar chuig ceardlann (nó seimineár) lae chun tírdhreacha ceapadh téarmaíochta i dteanga amháin nó trasna teangacha a iniúchadh agus a phlé. Agus plódú téarmaí ón mBéarla isteach i dteangacha eile á chur san áireamh, an bhfuil nithe ann a d’fhéadfaimis a fhoghlaim óna chéile faoi na bealaí a gceaptar téarmaí nua inár dteangacha éagsúla?

Más spéis leat páipéar a thairiscint do Cheardlann TOTh 2019, ba chóir achoimre 2-3 leathanach, mar aon le leabharliosta, ina rianófar éirim an pháipéir a chur i mBéarla, Fraincis nó Gaeilge chuig workshop2019@toth.condillac.org faoin 9 Lúnasa 2019. Deimhneofar glacadh na bpáipéar faoin 15 Meán Fómhair.

Cé go bhfuil sé riachtanach clárú don cheardlann, ní bheidh aon táille le híoc acu siúd a mbeidh páipéir á dtabhairt acu. Déanfaidh Foras na Gaeilge lónta agus ócáid shóisialta a óstáil, agus is gá do rannpháirtithe, cainteoirí san áireamh, a gcuid costas taistil agus lóistín féin a sheasamh.

Cuirfear sonraí breise faoin gceardlann ar fáil níos gaire don am ag http://toth.condillac.org/workshop-2019 agus is féidir fiosruithe a chur chuig docroinin@forasnagaeilge.ie

Bhí ábhar ceiliúrtha againn le déanaí nuair a rinneadh an 100,000,000ú cuardach ar shuíomh téarma.ie, an Bunachar Náisiúnta Téarmaíochta don Ghaeilge. Cuireadh tús leis an tionscadal seo in 2005 agus tá sé ag dul ó neart go neart ó shin. Cuimsíonn saothar an Choiste Téarmaíochta réimse leathan ábhar teicniúil ach, mar a tharlaíonn sé, bhí an 100,000,000ú cuardach a rinneadh ar an suíomh ar cheann de na hiontrálacha is simplí sa bhunachar: forc!

Éacht mór é seo don Choiste Téarmaíochta a bhfuil a ollsaothar téarmaíochta foilsithe ann, do Fiontar & Scoil na Gaeilge (DCU) a dhéanann forbairt agus bainistiú ar an mbunachar, agus d’Fhoras na Gaeilge, a chuireann maoiniú ar fáil. É sin ráite, ní bheadh an t-éacht seo indéanta murach úsáideoirí an tsuímh, ar ndóigh, agus is muidne atá fíorbhuíoch díbh uilig as ucht bhur gcuid tacaíochta ó thús an tionscadail. Ar aghaidh linn anois go dtí an chéad chloch mhíle eile!

Ba mhór le Foras na Gaeilge thú a bheith i láthair ina cheannáras, 63-66 Sráid Amiens, Baile Átha Cliath 1, ar 6 p.m. ar an Iúil chun an tionscadal litearth aEorpach Focail Eile a cheiliúradh.

Ba mhaith le Foras na Gaeilge tréimhse chomhairliúcháin phoiblí ar thionscnaimh mhaoinithe Fhoras na Gaeilge, i dtaobh earnáil na meán Gaeilge clóite agus ar líne don tréimhse Eanáir 2020 ar aghaidh, a fhógairt. 

Ba mhaith linn tuairim an phobail a fháil maidir leis na moltaí ag eascairt as an athbhreithniú agus tá cóip den doiciméad comhairliúcháin ar fáil anseo:

Comhairliúchán ar Earnáil na Meán